Home

Wednesday, January 5, 2011

kavitakosh.org

Tuesday, December 28, 2010

Books of Shivraj Bhartiya





Tuesday, November 30, 2010


Sunday, March 28, 2010

आंतरो

हां रफीक


ओ बखत रो आंतरो है

कै मनां रो

कीं कह नीं सकूं

पण हां

अतरो जरूर जाणूं

थंू भी नीं भूल्यो व्हैला

टाबरपणै री उण भेळप नैं

जद

आपां गांवता

होळी री धमाळ

साथै-साथै

भेळा हुय‘र छांटता रंग

अेक दूजै माथै।

घर वाळा भी नीं ओळखता

अेक निजर में

कुण सो रफीक है

अर कुण सो राजीव

ईद रै मोकै

गळ बांथी घाल्यां

जद

आपां दोन्यू जांवता ईदगाह

तद कुण सोच्यो

कदैई

फकत फोन माथै ही

बेलांला.......ईद मुबारक......।

स्यात्

थूं भी नीं पांतर्यो व्हैला

स्काउटिंग रै

उण कैंपां नै

जद/परभात फेरी में

म्हारी बारी होंवती

तो भी थूं ही बोल्या करतो

परभाती अर रामधुन

अर ‘सर्वधर्म प्रार्थना‘ में

म्हारा होंठ भी

मतैई खुल ज्यांवता

थारै साथै-साथै

बोलण सारू

‘बिस्मिल्ला हिर्रहमान निर्रहीम‘

हां रफीक हां

ओ बखत रो आंतरो है

कै मनां रो

कीं कह नी सकूं

पण हां

अतरो जरूर जाणूं

उण टाबरपणै में

आपां कित्ता बडा हा।

पीड़

आपां बांटां

पन्दरै अगस्त मनावां
सालूं-साल
गावां गीत
नाचां -कूदां
गूंजावां च्यारूंमेर
आजादी रो संगीत
देस रै इतिहास री
धणी महताऊ धटना है आजादी
जिणनैं जरूर याद राखणी
पण नीं बिसराणीं
इण मोकै री दूजी घटना
जद कूक्या
पंजाब,लाहौर अर पटना
देस री नदियां रो पाणी
रातो हुग्यो
मिनखां रै लोही सूं
के मुसळमान अर के हिन्दू
सैं रो मिनखपणो सोग्यो
मिनख माथै
राखस हावी हुग्यो
खंड-खंड हुग्या
मिनख/परवार
अर
खंड-खंड हुग्यो देस।

हांती

आपां बांटां


सगळां नै

दीयाळी रो उजास

ईद री मीठास

गुरूवाणी रो परकास

अर मिनख

ताजी सांसां लेय ‘र

उडै

खुलै आकास।